حينما غنى المطرب العراقي الكبير ناصر حكيم أغنيةـجفنه علم الغزل ـ!

جلال چَرمَگا / زيورخ

ألأمثال الشعبية التي نتداولها ونسمعها ونقرأها هنا وهناك .. كلها حكم وعبر وجاءت نتيجة ممارسات واقعية على أرض الواقع ..لذلك لكل حالة من ألأحوال وأی التصرفات تقابلها حكمة من الحكم .. ولكن المصيبة نحن معشر البشر لانتعظ ..لابل لانعترف بأخطائنا ..هكذا كانت الدنيا وستظل الى يوم يبعثون !!!.
قبل أيام روى لي / أخي وعضد أيدي حمدان البغدادي هذه السالفة اللي تخرب ضحك .. فقررت أن أدونها ليقرأها أساتذتي وزملائي الكتاب والقراء معاَ!!!.
بعد السلام والتحية وطيب الخاطر والسؤال عن ألأولاد والمرة والحجية وأنقطاع الكهرباء وأنعدام الغاز والنفط وهذه الموجة الكَشرة من البرد وحرامية / وزارة التجارة وحجاج البرلمان .. نزولا الى أرتفاع أسعار الشلغم والفجل والطحين ألأبيض وطبقة البيض ودبس أي أي و جشاعة بائعي النفط والفحم..هو أكو شىء في وطننا الجريح ـ صاغ سليم ـ ؟؟ لا كفيلكم أبو الجوادين... كلها خربت.. صارت كالكهرباء!!!.
جائني حمدان وهو واضع منديله على فمه و ـ خربان من الضحك ـ !!!!.
ــــــــــــــــــــــــــ
ــ خير أنشاءالله.. ياربي أجعلها ضحكة خير ... شسامع اليوم؟؟؟ أشو عصافيرك أمعلكَة بالسما... نورنا ؟؟؟.
+ الله ينورك ... بروح أبيك خليني أشبع ضحك... أتركني !!.
ــ يامصخم.... أقلها ضحكنا وياك !!!!.
بس شيفيد.. يدك على ركبه ولازم الجفية ويدكَ رجل بالكَاع... في الحقيقية الا شوية وأطلع من طوري !!!.
ــ حمدان..؟؟؟ تحچي لو أروح ؟؟؟؟.
+ بروح أبوك ... بس دقيقة !!!.
ومستمر بالضحككككك ... يايابة شلون يضحك ؟؟؟؟؟.
ــ عمي أخذ دقائق... بس خلصنا !!!.
+ أنت سامع بالمثل اللي يكَول : أنطي الخبزلخبازته !!!؟؟؟.
ــ حمدان ... شلون ماسامع؟؟؟... هذا ينطبق وينكَال على أساس كلمن وأختصاصة !!.
+ الف رحمة على هذولاك... تمام !!.
ــ زين وهاي صارلك ساعة تضحك.. وعيونك أمدمعات .. على هذه؟؟؟؟.
+ لاء أخوية .. أسمعني.
ــ سامعك.. بس هات من ألأخر .
+ جارنا شاب يدعي الثقافة والفنون ... ملابس غريبة وعلى طول خابصنة بالأغاني الهابطة.. يرفع المسجل الى ألأخر... ألأخ يريد يصير مطرب يعني حاله حال ألأخوة أصحاب أغاني / يمه كَرصتني العكربة .. وغيرهم .. وألأدهى يريد أن يطور ألأغاني التراثية حسب نظرياته !!.
ــ وشكو بيه؟؟؟ يعني بقت عليه؟؟؟ أشو كلها تغني... وبعدين الفن مو عيب .. وألأهم التطور المعقول ضروري ولكن ليس التطور الذي يخرب ألأول وألأخير ... يعني..
+ أخوية ..هيواشك.. لا تتفلسف براسي .... أستغفرالله .. خليني أكمل .
ــ تفضل ...
+ رايح للأذاعة ديختبر ويريد يصير مطرب ألأذاعة والتلفزيون والسينما .. بالأختبار العملي راسب.. بعدين بالشفهي .. سألته اللجنة عن أسم مطرب أغنية / جفنه علم الغزل ..
ــ هذه سهلة..للموسيقار / محمد عبد الوهاب.. والله سؤال سهل.. يعني حظه زين!!.
+ يازين ؟؟؟؟ يكَولك رأسا كَال للمرحوم / ناصر حكيم !!!.. مو حقي أخرب من الضحك؟؟؟.
ــ والله حكَك.. هذه فعلا ينطبق عليه المثل... وبعدين ؟؟؟.
+ شفته.. كان ضايج.. واسيته.. كَتله ياوليدي يا عزيز كَلبي .. يعني أنت ماعندك ثقافة موسيقية ولا غنائية.. شلون تريد أتصير مطرب ؟؟؟ .. يعني بصريح العبارة ماعندك خلفية بالمسألة !!!.
ــ وشكَالك ؟؟؟.
+ بالحقيقة... صفن .. رد فد رد كلش قوي!!.
ــ شكَال بالله .
+ بالحقيقة كَال :
عمي هي كلها حظوظ ... يعني هالأيام كل ألأعمال مايرادلهه خلفية .. واسطات وحظوظ تعلب أدوار ما تصدكَ .. وراح أثبتلك !!!.
ــ شكَالك بالله ؟؟؟.
+ كَال .. عمي هم السياسيون الكبار.. ورؤساء ألأحزاب مو من المفروض أن تكون عدهم خلفية سياسية ؟؟؟؟.
كَتلة :
بالتأكيد.. وإلا شلون صارو رؤساء آحزاب !!!؟؟.
كَالي:
راح أثبتلك العكس... رئيس حزب جبير كلش ومعروف كلش .. كَاعد وية فد مسؤل عربي هو هم كلش جبير و (الجبير الله ) ... صارت مناقشة على / عمر المختار... تدري شكَال صاحبنا رئيس الحزب واللي هو جبير كلش .. ؟؟؟.
شكَال بالله.. معقولة كَال أنه خائن لاسامح الله .
لاء... كَال أنه جزائري... من الجزائر !!!!!!.
+ يامعود على بختك شلون.. أخاف كان يقصد الرياضي / زين الدين زيدان ؟؟؟ لو رجل الدين / علي بلحاج؟؟ لو المطرب / رابح درياسة .. لو الشاب خالد ؟؟؟؟.
ــ حمدان.........؟؟؟ .
+ وحق لا اله الا الله.. هذا اللي صار بالضبط !!!.
ــ زين وهذا المسؤل منهو؟؟؟ شسمه ؟؟؟؟ .
+ يامعود..؟؟؟ شنو أني مخبل أجيب أسمه؟؟؟ شنو جايز من روحي ؟؟؟... واللي خلقك وخلقني أذوب بعز الظهر ..!!... بيش تطلبني؟؟ مو صاحب عائلة جبيرة !!.
ــ زين أترك صاحبنا رئيس الحزب .. بس المسؤل العربي الجبير كلش شسمه ؟؟؟.
ــ أسمه / عمرو ذياب!!!!!!!.
ــ شنوووو ؟؟؟ يامصخم.. عمرو ذياب يمته مسؤل؟؟ هذا مطرب مشهور من مصر !!!.
حمدان لايزال خربان من الضحك وكَال.. :
أمين عام الجامعة العربية.. عمرو موسى.. عمرو موسى ......... موعمرو ذياب!!!... هاي شلون ورطة ؟؟؟ كَمنا نسحب خارج .. بالعظيم مسخرة !!.
وأني أكَول:
ــ ليش لاء ؟؟؟ هم رؤساء ألأحزاب الكبار مايعرفون الف باء السياسة هي بقت على ذاك الشاب المسكين اللي ما عرف صاحب أغنية / جفنه علم الغزل ؟؟؟ لو على أخوية / حمدان البغدادي اللي كَام يخربط بين ذياب وموسى .. ؟؟؟ .
ومنا وغاد لانستغرب أذا سمعنا بأن صاحبة أغنية / أنت عمري هي الفنانة الكبيرة / حمدية صالح !!!!! والثائر / جيفارا من بوركينا فاسو.. و / نلسون مانديلا من سريلانكا ... ليش لاء؟؟؟.