Skip to main content
Facebook Twitter YouTube Telegram

نريد حكومة كلدوأشورية كبل ما يضيع العراق بين الشيعة والسنة والكردية

شكد ما أشوف راح يضيع العراق بين العرب الشيعة والسنة وأخوانا الأكراد .. أي راح تضيعون العراق .. كل واحد منكم يكول أني الأصل بالعراق .. أني الأحق بثروات العراق .. أني اللي أحب وأعشق العراق .. أني اللي أعرف مصلحة العراق .. أني أكثركم ولاء ووفاء للعراق .. بس أني أعرف اللي يحب وحدة يهديلها وردة .. يهديلها ذهب .. يبنيلها قصر ويحرسها وبروحه يفديها .. بس أنتو العراقيين خوش عبرتو عن حبكم للعراق هذا يقتل ويغتال بأسم الأخلاص للعراق وذاك يفخخ ويزرع عبوات ناسفة ويقتل بأسم الحرص على مصلحة العراق وذاك وذاك يبوكون وينهبون ويسرقون ويسلبون بأسم الحفاظ على ثروات العراق .. ولكم هذا خبال وخيانة وجنون .. هذا مو حب وولاء .. وجمالة ما مبين أن أكو نهاية لكل هاي المصايب .. السنة مستعدين يحركون العراق بس ما يشوفون حكومة شيعية والشيعة يكولون كافي للسنة .. شبعتو بيه سنين عوفوها النا وروحو أنتو كعدوا بعيدين .. العرب يكولون شلون رئيسنا كردي وأحنا دولة عربية والأكراد يكولون هاي هي أحنا كبلكم بأرض العراق .. أحنا أكثر منكم عراقية .. تعالوا يا ناس حلوها .. تلث سنوات أحنا على هالحال .. والله خايف لا يضيع العراق بين هذا وذاك ..

واللي قاهرني وكاتلني ومصعد ضغطي ليل نهار أن اللي لا قتلوا ولا فجروا ولا سرقوا ولا نهبوا .. واللي يصلون للسلام واللي همه أصل العراق واللي ثبتوا أنو همه الأخلص بالعراق يدفعون يومية ثمن أخلاصنا أحنا للعراق .. الكلدوأشوريين هذولة المساكين اللي جوه رجلينا مسحوكين لا همه ميتين ولا عايشين ولا همه مذكورين ، كلنا نعرف التأريخ ونعرف منو أجدادهم ونعرف أن العراق كان عراقهم ونعرف زين أنو همه الوحيدين اللي كدرو يوسعون حدود العراق ويحمون تراب العراق ويرفعون راس العراق .. همه اللي شالوا القلم وكتبوا أول الحروف .. همه اللي بنوا القصور والقلاع والحصون .. هموا اللي سنوا القوانين والقواعد .. همه اللي حفروا القنوات والمبازل .. همه اللي صارعوا الأسود .. همه أسسوا أولى وأقوى الحضارات .. همه اللي كانوا الأول وأحنا بهمجيتنا سويناهم الأخيرين وما نستحي نسميهم أقلية .. بصايتنا ووصاية حروبنا الغبية شلون ما يصيرون أقلية ..من ورا حروبنا وعنصريتنا هجوا ورحلوا من هاي الديار والبقية صارت أقلية وأحنا صرنا الأكثرية .. كرة عينه العراق بهاي الأكثرية .. ما خلينا دولة بالعالم ما هانت وأحتلت العراق .. مرة مغول ومرة تتر ومرة فرس ومرة عثمانيين ومرة أنكليز ومرة أمريكان .. ولا مرة كدرنا نحمي حدود العراق .. الكلدوأشوريين اللي نسميهم أقلية روحوا أقروا التأريخ وشوفوا شلون كدروا على اليهود وأحنا العرب اليوم أكثر من عشرين دولة صايرين مضحكة لليهود ..

أستراليا تصرف الملايين حتى تحافظ على الكنغر والكوالا .. والصين تصرف الملايين حتى تحافظ على الباندا وما أدري يا دول تصرف كذا مليون حتى تحافظ على طير لو سمجة لو حيوان وأحنا نستهين بأعرق الشعوب بالعالم نهججهم ونفجرهم ونهددهم ونسميهم أقلية .. هاي شلون أكثرية خايفة على نفسها من الأقلية ..

شوفوا شوفوا الكلدوأشوريين شلون يعتزون بتأريخهم ويفتخرون ويحمون أرث أجدادهم وأحنا هجمنا على راس المنصور وفجرنا مرقد الأمام الهادي والملوية ونعفط لعصر هارون ونلعن خلفائنا الراشدون .. أقروا تأريخ الكلدوأشوريين وشوفوا البناء والأعمار والأنتصارات وأقروا تأريخنا وشوفوا صراع على الكراسي والخلافات .. وكل هاي ونسميهم أقلية ونتباهى أنو أحنا الأكثرية .. والله كمت أستحي لأن أني من الأكثرية .. بس هالمرة الا أنطي صوتي للكلدوأشورية وبعلو صوتي أكول يشرفني أصير من الأقلية ..



Siduri_uruk66@yahoo.com


Opinions
الأرشيف اقرأ المزيد
من أجل حملة دفاع دولية لحماية المجموعات القومية والدينية القديمة في العراق تمضي الأيام والوضع العراقي العام بين هدوء نسبي حذر مشوب بتفاعلات متشنجة وآخر يعود القهقري بجملة الأمور بسبب من تحدد الوضع بعمليات علاوي لـ(صنداي تلغراف): البرامج والقضايا العالقة اولاً وليس المناصب شبكة أخبار نركال/NNNN/ نشرت صحيفة الصنداي تلغراف في عددها الاخير الصادر بتاريخ 19 أيلول الجاري لقاءاً للدكتور اياد علاوي تحدث خلاله عن تشكيل الحكومة والسبل الكفيلة للوصول الى حكومة وحدة وطنية، جاء فيه: الشهيد الشيوعي: حلم أخضر بطوق ياسمين احم كفاح الطائي شابٌ عشرينيٌ كان يُفتشُ عن فضاءٍ حرٍ ليطلقُ العنانَ لأحلامهِ الخضر، وحين قرر أن يصرخ بإحلامه وسطَ جدران مغلقة، تَسربتْ صرختهِ الى قداسة البطريرك مار أدى الثاني يؤدي الصلاة على أرواح شهداء قرية صورية في الموقع الذي ضم رفاتهم الطاهرة في القرية شبكة أخبار نركال/NNN/شليمون داود أوراهم/ ضمن محطات الزيارة الرعوية الحالية لقداسة البطريرك مار أدى الثاني رئيس الكنيسة الشرقية القديمة في العراق والعالم إلى
Side Adv1 Side Adv2